أولكشى

أهم صفة فى الراجل بل والصفة الأساسية والتى لا يجب أن يتخلى عنها أى رجل لأنها ببساطة مشتقة من لقبة الإنسانى هى الرجولة
وكلامنا هنا هيبقى كله عن هذه الصفة والتى والحمد لله هى أهم صفاتى بل تكاد تكون هى الصفة الغالبة فى جميع تعاملاتى وخصوصا تعاملاتى مع الجنس العنيف قصدى...... قصدى.... قصدى يووووووه .... مش عاوزة تطلع
المهم
فى البيت عندى ثلاث ولاد حسن وحسين ودول توأم ( يعنى توينز )- مش بقولوكم راااااااااااجل - ودول عندهم 4 سنين وكمان فريدة وديه سنه ونص بس وديه سميتها بمحض أرادتى وأنا فى كامل قوايا العقلية على أسم حماتى وده كنوع من أنواع الديمقراطية - المحدودة التى أطلقها فى بيتى -( وكمان أسم فريدة ده على الموضة) المهم هعرض عليكم بعض طرقى فى التعامل مع ست البيت عشان تبقى راجل وما تبقاش ملطشة للى رايح واللى جاى فى قلب البيت وتبقى عامل زى المطب اللى مالوش لازمه فى الشارع غير أنه الناس تدوس عليه وأليكم أهم النصائح
1. ممنوع مانعا باتا تنزل تشترى حاجة من السوق لما أنت تشترى طلبات البيت أمال الهانم تعمل أيه بقى تقعد على القهوة
2. مصروف البيت لازم يكون محدود مش تسيب السايب فى السايب كده وأعرف تمام المسيطر أقتصاديا مسيطر سياسيا وكمان مش مفروض تعرفها دخلك أد ايه بالظبط يا عم دارى على شمعتك تأيد
3. لازم كل يوم والثانى عالقة سخنة لتنشيط الحياة الزوجية لإثبات ( رجولتك ) وأضرب المربوط يخاف السايب
4. ما تعرفهاش كل أصحابك – أمال لما تحب تزوغ هتقولها كنت فين على إحتمال تطلع عندها سنة ذكاء وتتصل تتأكد فلما تقولها أنا كنت فى عزاء أبو عباس صاحبى هى ما تعرفش عباس أصلا علشان تتأكد منه

يالهوووووووووووووووووووووووووووى جرس الباب بيخبط انا مضطر أنهى دلوقتى الساعة بقت 3 بعذ الضهر و مراتى رجعت من الشغل وهتطين عشتى علشان ما خلصتش الغدا وقعدت أكتب

يتبــــــــــع